விசேட கடமைக்கு வந்த பரீட்சை மேற்பார்வையாளர் குழு மீது பரீட்சார்த்தி மாணவர்கள் சரமாரி தாக்குதல்; சம்மாந்துறை தொழினுட்ப கல்லூரியில் பதற்றம்!!

                                                                    - அம்பாறை மாவட்ட விசேட நிருபர் -
சம்மாந்துறை தொழினுட்ப கல்லூரிக்கு தொழினுட்ப கல்வி திணைக்களத்தின் அறிவுறுத்தலுக்கு அமைய விசேட கடமைக்கு வந்து இருந்த பரீட்சை மேற்பார்வையாளர் குழு மீது பரீட்சார்த்தி மாணவர்கள் ஒரு தொகையினர் வெள்ளிக்கிழமை பிற்பகல் சரமாரியாக தாக்குதல் நடத்தி விட்டு தப்பி சென்றார்கள்.

மேற்பார்வையாளர், உதவி மேற்பார்வையாளர்கள் இருவர் இச்சம்பவத்தில் பலத்த காயங்களுக்கு  உள்ளாகி சம்மாந்துறை ஆதார வைத்தியசாலையில்  சத்திர சிகிச்சை பிரிவில் சிகிச்சைக்காக அனுமதிக்கப்பட்டுள்ளனர்.

கல்லூரியின் கல்வியாண்டு 2019 இற்கு உரிய மட்டம் - 05, 06 ஐ சேர்ந்த விவசாய டிப்ளோமா மாணவர்களுக்கு இறுதி தவணை பரீட்சைகள் இடம்பெற்று வருகின்றன. 

மேற்பார்வையாளர் மட்டக்களப்பு தொழில் நுட்ப கல்லூரியை சேர்ந்த விரிவுரையாளர் ஆவார். இவருக்கு தலையில் பலத்த காயங்கள் ஏற்பட்டதால். இதனால் இவரை சத்திர சிகிச்சை சோதனைகளுக்கு உட்படுத்த நேர்ந்துள்ளதாக அறிய முடிகிறது.

மட்டக்களப்பு தொழில்நுட்ப கல்லூரியை சேர்ந்த மற்றொரு விரிவுரையாளரான உதவி மேற்பார்வையாளருக்கு தலையிலும், அக்கரைப்பற்று தொழில் நுட்ப கல்லூரியை சேர்ந்த விரிவுரையாளரான உதவி மேற்பார்வையாளருக்கு கையிலும் காயங்கள் ஏற்பட்டு உள்ளன.

கல்லூரியில் பதற்றமும், பாதுகாப்பற்ற சூழலும் ஏற்பட்டதை தொடர்ந்து சம்மாந்துறை பொலிஸ் நிலைய பொலிஸாருக்கு அறிவிக்கப்பட்டு பொலிசார் கல்லூரி வளாகத்தில் பாதுகாப்பு கடமையில் ஈடுபட்டுள்ளார்கள்.

மேலும் பொலிஸார் வைத்தியசாலைக்கு வந்து பாதிக்கப்பட்ட மூவரின் வாக்குமூலங்களை பதிவு செய்கின்ற நடவடிக்கைகளை மேற்கொண்டனர்.

பாதுகாப்புக்கு உத்தரவாதம் இல்லாத நிலையில் மேற்பார்வை கடமையில் ஈடுபட முடியாது இருப்பதாக தொழில் நுட்ப கல்வி திணைக்களத்துக்கு மேற்பார்வையாளர் குழு அறிவித்தல் கொடுத்துள்ளது.

No comments

Powered by Blogger.